សិក្ខាសាលាស្តីពី យុទ្ធសាស្រ្តទីផ្សារ និងឱកាសការងារនៅគ្រឹះស្ថាន អេ អឹម ខេ ដល់និស្សិតសាកលវិទ្យាល័យ IIC
កាលពីព្រឹកថ្ងៃសុក្រទី២១ ខែសីហា ឆ្នាំ២០១២ សាកលវិទ្យាល័យអាយអាយស៊ីនៃបច្ចេកវិទ្យា បានចូលរួមសហការ ជាមួយអង្គរ មីក្រូហិរញ្ញវត្ថុ (អេ អឹម ខេ) រៀបចំធ្វើសិក្ខាសាលាមួយស្តីពី យុទ្ធសាស្រ្តទីផ្សារ និងឱកាសការងារ នៅគ្រឹះស្ថាន អេ អឹម ខេ។
នេះជាសិក្ខាសាលាថ្មីមួយទៀតដែលសាកលវិទ្យាល័យ IIC បានធ្វើក្នុងគោលបំណងបង្កើនចំណេះដឹង និងបទពិសោធន៍ ជាក់ស្តែងដល់និស្សិតរបស់ខ្លួនបន្ទាប់ពីបានរៀនទ្រឹស្តី ដើម្បីត្រៀមខ្លួនចូលរួមក្នុងឱកាសសមាសហរណកម្មអាស៊ានឆ្នាំ២០១៥ ខាងមុខនេះ។
សិក្ខាសាលានេះមានរយៈពេលជាង ៣ម៉ោង ហើយដែលមាននិស្សិតចូលរួមជាង ៤០០នាក់។ ក្រៅពីបង្ហាញ យុទ្ធសាស្រ្តទីផ្សារដែល អេ អឹម ខេ ធ្លាប់បានអនុវត្តកន្លងមក ហើយដែលធ្វើឱ្យគ្រឹះស្ថានមួយនេះទទួលបានជោគជ័យដូចសព្វថ្ងៃ វាគ្មិនក៏បានបង្ហាញពីមុខងារ និងភារកិច្ចទទួលខុសត្រូវរបស់បុគ្គលិកតាមផ្នែកនីមួយៗ ព្រមទាំងរបៀបរៀបចំឯកសារនានា ដើម្បីសុំការងារធ្វើនៅ អេ អឹម ខេ ក៏ដូចជាអង្គភាពផ្សេងៗផងដែរ។
សិក្ខាសាលានេះបានបញ្ចប់ទៅ ក្រោយពីវាគ្មិនឆ្លើយសំណួរដ៏ច្រើនរបស់និស្សិត IIC ហើយនិស្សិត IIC បង្ហាញនូវការចាប់អារម្មណ៍ និងមានសេចក្តីរីករាយយ៉ាងខ្លាំង ដោយសារពួកគេមិនត្រឹមតែទទួលបានចំណេះដឹង និងបទពិសោធន៍ជាក់ស្តែងប៉ុណ្ណោះទេ ថែមទាំងមានឱកាសដាក់ពាក្យ សុំបម្រើការងារនៅគ្រឹះស្ថាន ខេ អឹម ខេ ទៀតផង៕